“Мірная сіеста пасьля падзеньня Бэрлінскага муру была падманлівай”, – сказаў Пампоўскі. Ён патлумачыў, што расейцы выкарысталі арабскі сьвет для таго, каб стварыць праблемы і пачаць гуляць гульні з будучымі коштамі на энэрганосьбіты. “Калі вы пагаворыце з дысыдэнтамі з КГБ, – адзначыў ён, – яны скажуць вам, што найбольш важным навукова-дасьледчым аддзелам у КГБ перад уварваньнем у Аўганістан быў аддзел, прысьвечаны арабскай мове, культуры і ісламу”. Арабы і іранскія мусульмане кантралююць вельмі значную частку сусьветнай вытворчасьці энэрганосьбітаў. Калі ў гэтых краінах або паміж гэтымі краінамі будуць справакаваныя хваляваньні, то Расея атрымае больш грошай ад свайго экспарту энэрганосьбітаў. Напрыклад, палітычная дэстабілізацыя Саудаўскай Аравіі можа быць вельмі выгаднай для Расеі. У цяперашні час заахвочваньне іранскіх ядзерных амбіцый поруч з накладаньнем на Іран санкцый можа таксама прынесьці Расеі большыя прыбыткі.
Расея таксама ажыцьцяўляе эканамічнае пранікненьне ў Эўропу і Ізраіль. “Расейскія алігархі скупляюць ізраільскія сродкі масавай інфармацыі. – сказаў ён. – Між тым, Рупэрт Мэрдак апынуўся пад атакай якраз у той момант, калі пачаў інвэставаць грошы ва Ўсходнюю Эўропу”. Пампоўскі зьвярнуў увагу на тую акалічнасьць, што сапернік Мэрдака ў Злучаным каралеўстве – гэта “былы” афіцэр савецкага КГБ Аляксандр Лебедзеў, які валодае газэтай “Evening Standard” і набывае газэту “News of the World” Мэрдака, зачыненую тры тыдні таму на хвалі скандалу, калі брытанская паліцыя выявіла, што супрацоўнікі “News of the World” праслухоўвалі тэлефонныя размовы амаль 4000 чалавек, у тым ліку асобаў з каралеўскай сям'і. “Зьвярніце на гэта ўвагу”, – сказаў Пампоўскі.
Калі я запытаў у Пампоўскага, чаму расейскія агенты будуць блякаваць Мэрдака ва Ўсходняй Эўропе, захопліваючы яго актывы ў Вялікабрытаніі, ён патлумачыў: “Я мяркую, што Масква вымушана задушыць альтэрнатыўныя галасы”. Чаму гэта неабходна? Масква спрабуе адкалоць Эўропу ад Амэрыкі з дапамогай антыамэрыканскіх актыўных мерапрыемстваў. СМІ Мэрдака зьяўляюцца перашкодай для гэтых намаганьняў. “Нябожчык генэрал Одам лічыў, што Савецкі Саюз ператварыўся ў гэтыя разнастайныя арганізацыі, – адзначыў Пампоўскі. – У цяперашні час краіны НАТО павінны зразумець гэты новы комплекс улады і зьвярнуць на яго ўвагу”. Небясьпечным, сказаў Пампоўскі, зьяўляецца тое, што Расея можа “дэстабілізаваць і пашкодзіць структуры, створаныя пасьля Другой сусьветнай вайны, якія былі часткай заходняй сыстэмы бясьпекі”. Афіцыйная палітыка Расеі заключаецца ў стварэньні новай “архітэктуры бясьпекі для Эўропы”. Гэта перакладаецца як “Эўропа без НАТО”, ці іншымі словамі – Эўропа, кантралюемая Расеяй.
Пампоўскі таксама казаў пра раскрыцьцё таго факту, што выбух каля амбасады ЗША ў Грузіі ў мінулым годзе быў праведзены расейскім афіцэрам ГРУ маёрам Яўгенам Барысавым і каардынаваўся расейскай ваеннай выведкай. Чаму расейскія ваенныя кіраўнікі загадалі напасьці на амбасаду ЗША? “Я лічу, што расейская дзяржава знаходзіцца ў поўным замяшаньні, – патлумачыў Пампоўскі . – Унутры дзяржавы ёсьць некалькі крымінальных сіл, і ўсе яны дзейнічаюць у розных накірунках. Я мяркую, што ў рэшце рэшт яны прайграюць. Расея – краіна-ізгой". Яна – краіна-ізгой у поўным сэнсе гэтага слова”. Справа ў тым, што Расея заціснута паміж нацыяналістычным, камуністычным, мафіёзным і псэўдаправаслаўным уладнымі блёкамі. Аднак усе разнастайныя ўнутраныя расейскія ўладныя групы падзяляюць адзін і той жа погляд, калі справа датычыцца Амэрыкі. “Ці бачылі вы паведамленьне аб наведваньні амбасадарам Расеі ў НАТО прадстаўнікоў Кангрэса? – Спытаў Пампоўскі. – Амбасадар Рагозін сустракаўся з сэнатарамі Кайлам і Кіркам у аўторак ці ў чацьвер, і ён назваў іх “пачварамі Халоднай вайны”.
Пампоўскі таксама казаў пра псэўдахрысьціянскага нарвэскага тэрарыста Андэрса Бэрынга Брэйвіка, які нібыта ў пачатку гэтага года праходзіў падрыхтоўку ў сакрэтным ваенізаваным палявым лягеры ў Беларусі (былой савецкай рэспубліцы, якая ў цяперашні час абараняецца расейскімі ўзброенымі сіламі і выкарыстоўвацца ў якасьці канала для экспарту злачыннасьці, наркотыкаў, зброі і, магчыма, нават тэрарыстаў). Мяркуецца, што Брэйвік наведаў Менск вясной мінулага года. “Існуе дыскусія наконт сувязяў гэтай трагедыі ў Нарвэгіі з Расеяй, – сказаў Пампоўскі. – Інфармацыя расьце увесь час”. Быццам бы псэўданімам Брэйвіка ў беларускім КГБ было слова “Вікінг”. Хоць яго сувязь з Расіяй не даказана, яго захапленьне Пуціным і палітычнай сыстэмай Расеі супадае зь яго агідай да мяккай, палітычна карэктнай дэмакратыі Заходняй Эўропы і Скандынавіі.
Я спытаў Тамаша аб думцы, што хтосьці ў Маскве падштурхоўвае правы экстрэмізм ў Эўропе. “Я схіляюся да гэтай тэорыі, – адказаў Пампоўскі. – Але вы ня можаце знайсьці ва ўсім гэтым аднароднай расейскай мэты. Ні адзін чалавек не кантралюе расейскую дзяржаву цалкам. Гэта канглямэрат розных дзяржаў”. “Канешне, у падтрымцы славянскага нацыяналізму няма нічога новага, – растлумачыў ён. – Напрыклад, яны стаялі за нацыяналізмам Слабадана Мілошавіча ў Сэрбіі. Расейцы ўдзельнічаюць у шматлікіх маніпуляцыях, некаторыя зь якіх былі распачатыя яшчэ пры Гарбачове або раней”. Згодна Пампоўскаму, мэта гэтых маніпуляцый – дэстабілізаваць Захад, справакаваць высокія цэны на энэрганосьбіты і пасадзейнічаць экстрэмізму. Расейскія вайскоўцы сапраўды спрыялі гэтаму руху ў Эўропе, – пацьвердзіў Пампоўскі. “У адрозьненьне ад армій Захаду, яны маюць катэдру ваеннай філязофіі, якая стаіць даволі высока ў сыстэме стратэгічнага камандаваньня. Гэтыя людзі сьцьвярджаюць, што яны – праваслаўныя расейцы, але большасьць расейскага праваслаўнага кіраўніцтва паходзіць з КГБ. У Савецкім Саюзе, каб стаць сьвятаром, вы павінны былі прайсьці [праверку ў] КГБ. Цяпер гэтыя людзі атрымалі свабоду дзеяньняў, але яны да гэтага часу задзейнічаны ў стратэгіі КГБ.
Я спытаў Пампоўскага пра выхад незалежнага дакладу аб трагічнай авіякатастрофе, у якой у мінулым годзе загінуў прэзыдэнт Польшчы, калі ён ляцеў каб прыняць удзел у жалобных мерапрыемствах з нагоды шасьцідзесяцігодзьдзя разьні ў Катынскім лесе, дзе ў 1940 годзе Саветы забілі тысячы польскіх афіцэраў. Ён распавёў, як расейскія афіцыйныя асобы перашкаджалі польскім сьледчым у справе авіякатастрофы, пазбаўляючы іх доступу да абломкаў самалёта, запісаў перамоў на борце самалёта і г.д. Падводзячы вынікі, Пампоўскі пераклаў верш польскага паэта Зьбігнева Гербэрта, які быў выкарыстаны ў дакладзе, і які прысьвечаны Катынскай разьні:
І толькі не даруйце,
Бо вы ня маеце права дараваць
Ад імя тых, каму здрадзілі.
1 жніўня 2011
Copyright © 2011 J.R. Nyquist
Russia’s Disruptive Role
No comments:
Post a Comment